Премиерно на 23 декември во просториите на Македонскиот Народен Театар ќе биде одиграна интимната претстава Разговори во четири очи. “Тоа е семејна драма, која обработува теми кои не засегаат и со која сакаме да допреме длабоко во човечките емоцииЌ рече Нина Николиќ режисерка на претставата работена по текст на Ингмар Бергман.
Адаптацијата на текстот е на Тамара Барачков, костимографијата на Ивана Каранфиловска Угуровска, сценографијата е на Сања Аврамоска, а продуцент е Томи Салковски. За видео и фотографија е ангажиран Петар Кочишки, автор на дизајнот на плакатот е Ника Гавровска, а Маја Трајаноска е консултирана за изборот на музиката.
Улогите ги толкуваат одличните и веќе докажани актери Амернис Нокшиќи Јовановска, Нина Деан, Петар Арсовски, Оливер Митковски, Дарја Ризова, Катина Иванова и Благој Веселинов, а на фотографија се појавуваат Мира Јовановска, Ана Атанасова и Магдалена Петрова.
Директорот на МНТ Дејан Пројковски посочи дека претставата е копродукција на продукциската куќа „Скопје филм Студио“ со Македонскиот народен театар. „Станува збор за прекрасен текст, како и прекрасна актерска екипа која ја изведува претставата“, додаде Пројковски.
Билетите за премиерата на 23 декември се пуштени во продажба на билетарницата на МНТ по цена од 500,00 ден.
За 24 и 25 декември (прва и втора реприза) цената на билетот е 300,00 ден.